د علومو اکاډمي پلاوي د بهرنيو چارو وزارت د کلتوري او بهرنيو اړيکو له رئيس سره وليدل
نېټه: ۱۴۰۲/۳/۲۹ هـ.ل
روانه اونۍ د دوشنبې ورځ د علومو اکاډمي د کلتوري او بهرنيو اړيکو رئيس ښاغلي مولوي محب الله عصمت په مشرۍ يوه پلاوي د بهرنيو چارو وزارت د کلتوري او بهرنيو اړيکو له رئيس ښاغلي سعدالله بلوڅ سره وليدل.
په دې ليدنه کې چې د علومو اکاډمي له لوري د سيمه ييزو مطالعاتو مرکز يو شمېر غړو ګډون درلود، د دواړو ادارو ترمنځ د ګډو علمي، کلتوري او څېړنيزو اړيکو پر پراختيا او همغږۍ بحث وشو. د يادونې وړ ده چې دواړو لوريو په علمي ډګر کې يو بل ته د همکارۍ ډاډ ورکړ او ښاغلي بلوڅ د علومو اکاډمۍ له ورغلي پلاوي څخه مننه وکړه چې د دولتي ادارو ترمنځ يې د اړيکو ټينګولو او همغږۍ لپاره ګام پورته کړ.
