د مرکزي آسیا پر وړاندې د ملي یووالي حکومت د بهرني سیاست ارزونه
کابل: د مرکزي آسیا پر وړاندې د ملي یووالي حکومت د بهرني سیاست ارزونې تر عنوان لاندې علمي ـ څېړنیز کنفرانس د روان ۱۳۹۹ لمریز کال د تلې میاشتې په ۵مه نېټه، د افغانستان د علومو اکاډمۍ د سیمه ییزو مطالعاتو د مرکز علمي غړي څېړندوی محمد سرور احمدزی له خوا وړاندې شو.
د دې کنفرانس د وړاندې کولو موخه د ملي یووالي حکومت پر مهال له مرکزي آسیا هېوادونو سره د افغانستان د بهرني سیاست ارزونه وه. دا چې مرکزي آسیا زیاتې طبیعي زېرمې او د انرژۍ د تولید پراخه ظرفیت لري، د مرکزي آسیا جیوستراتیژیک او جیو ایکونومیک موقعیت ته په پاملرنې د جمهور رئیس محمد اشرف غني د ملي یووالي حکومت پر مهال له مرکزي آسیا سره د اړیکو پر پراختیا او پیاوړتیا لپاره ډېرې او د پام وړ هڅې شوې دي.
څېړندوی سرور احمدزي وویل، افغانستان د ملي یووالي حکومت پر مهال د مرکزي آسیا پر وړاندې اقتصادي محوره بهرنۍ سیاست تعقیباوه. له مرکزي آسیا سره د افغانستان بهرني سیاست اساسي موخې دا وې چې افغانستان ترانسپورټي او ترانزیتي بدیلې لارې پيدا کړي او د سوداګرۍ او ترانزیټ برخه کې د پاکستان له فشارونو څخه ځان خلاص کړي، د سیمه ییزې همکارۍ پراختیا لپاره شرایط او زمینه برابره کړي او په سیمه ییزو چارو کې د افغانستان موقف پياوړی کړي. د بلې خوا د افغانستان سولې پروسه کې د مرکزي آسیا هېوادونو ملاتړ ترلاسه کړي او د عوایدو او مالیاتو نویو سرچینو ته لاره پيدا کړي.
څېړونکي په خپلو خبرو کې زیاته کړه، د مرکزي آسیا پر وړاندې د افغانستان بهرني سیاست پلي کېدو پر وړاندې ځینې ستونزې هم موجودې وې چې په افغانستان کې ناامنۍ او جګړه، د افغانستان حکومت کې د مسلکي او تخنیکي پوهې کمښت، د حکومتي ادارو ترمنځ کمزورې همغږي، داخلي اختلافات او سیاسي بې ثباتي، له مرکزي آسیا سره د اقتصادي اړیکو دقیقو ارقامو او معلوماتو کمښت ته اشاره کولای شو.
دا کنفرانس د وړاندیزونو په وړاندې کولو او ګډونوالو د پوښتنو په ځوابولو سره پای ته ورسېده او د رایو په اکثریت تائید شو.
