د امام بخاري(رح) او امام ترمذي (رح) د علمي او معنوي مقام په اړه د جوړېدونكي علمي څېړنيز نړيوال سيمينار د تدویر كمېسيون غونډه وشوه

په دې غونډه كې چې مشري يې د افغانستان د علومو اكاډمي رئيس څېړنپوه دكتور عبدالظاهر شكيب كوله او د جمهوري رياست د دفتر د عالي مقام استازي، د ولسمر د فرهنګي چارو سلاكار استاد اسدالله غضنفر ، د حج او اوقافو وزارت استازي ، د اطلاعاتو او فرهنګ وزارت استازي ، د كابل پوهنتون د شرعياتو پوهنځي استادانو ، د علماوو شورا استازي او د علومو اكاډمي د اسلامي علومو د معاونيت استادانو ګډون كړى و ، غونډه د قران كريم د څو مباركو آياتو په تلاوت پيل شوه ، وروسته دكتور شكيب د سيمينار په اړه اړوند معلومات وړاندې كړل ، ترڅنګ يې د غونډې د ګډونوالو نظريات هم شريك شول . په دې غونډه كې د امام بخاري او امام ترمذي په اړه د شپاړس عنوانه ليكل شوو او ترجمه شوو اثارو د چاپ په اړه پرېكړه وشوه ، دغه اثار به په پښتو ، دري او اوزبکي ژبه چاپ شي، همدارنګه د سيمينار لپاره د ليكل كېدونكو مقالو د عناوينو په اړه هم هر اړخيز بحث وشو او تر شلو زيات سرليكونه ومنل شول او پرېكړه وشوه چې ددې سيمينار لپاره دې د سيمې د اسلامي هېوادونو نخبۀ علماء هم راوغوښتل شي ، همدارنګه د سيمينار په اړه دې د دوست هيواد ازبكستان سره هم هماهنګي وشي ، په سيمينار كې د علمي كمېسيون ، تداركاتي كميسيون ، تشريفاتي او فرهنګي كمېسينونو په جوړېدو هم توافق وشو ، همدارنګه د سيمينار لپاره اړوندو كمېسونونو ته دندې وسپارل شوې ، تر څو ټول كارونه پر وخت او موقع تر سره شي ، بايد يادونه وكړو چې د اړوندو كمېسيونو غونډې به په دوامداره توګه ترسره كېږي او د سيمينار د تدوير د كمېسيون پرېكړې به تعقيبېږي . تر څو سيمينار په ښه شان او وقار ترسره شي.