د علومو اکاډمي د بشري علومو د برخې مرستيال معرفي شو
کابل: څېړنپوه دوکتور محمد علم اسحاق زی د افغانستان د علومو اکاډمي د بشري علومو د برخې د مرستيال په توګه، نن (یکشنبه) د ۱۳۹۹هـ. ش کال اسد په ۵مه د علومو اکاډمي د مشرتابه له خوا معرفي شو.
ښاغلی اسحاق زی د علومو اکاډمي د پیشنهاد او د جلالتمآب جمهور رئيس محمد اشرف غني د ۳۱/ ۴/ ۱۳۹۹ نېټې د ۹۷۸ ګڼه حکم له مخې پر يادې شوې دندې مقرر شوی دی.
د معرفۍ په دې مراسمو کې چې د علومو اکاډمي پر سرپرست رئيس څېړنوال دوکتور عبدالظاهر شکيب او د ولسمشر ستر سلاکار پوهاند دوکتور لعل پاچا ازمون سربېره د علومو اکاډمي مشرتابه او پوهانو ګډون کړی وو، نوموړي رسماً خپلې چارې پيل کړې.
ښاغلي دوکتور شکيب، دوکتور اسحاق زي ته د نوې دندې د مبارکۍ ويلو ترڅنګ هغه ته په ټولو علمي، تحقیقي او اداري چارو کې د برياليتوب هيله وکړه.
نورو ويناوالو هم د ښاغلي اسحاق زي پخوانيو علمي او اداري مسئوليتونو ته په کتنې، د بشري علومو د برخې د مرستيال په توګه انتخابېدل وستايل او هغه ته يې په ټولو کارونو کې د موفقیت ارزو وکړه.
د بشري علومو د برخې نوي مرستيال دوکتور اسحاق زي د علومو اکاډمي له مشرتابه او همدارنګه له جلالتمآب جمهور رئيس محمد اشرف غني څخه مننه وکړه چې پر ده يې اعتماد وکړ او د علومو اکاډمي د بشري علومو د برخې مسئوليت يې ور وسپاره.
ده ژمنه وکړه چې د وخت له تقاضا سره سم به هڅه کوي په ټولو علمي، تحقیقي او اداري چارو کې نوی والی ولري او د اکاډمي له مشرتابه سره په پوره همغږۍ دغه مسايل پرمخ يوسي.
د يادونې ده چې ښاغلي اسحق زي تردې مخکې د علومو اکاډمي د بشري علومو د بخش د اجتماعي علومو د مرکز د اقتصاد انستيتوت د تصدۍ ديپارتمنت آمر په توګه دنده لرله.
دغه راز نوموړي يو مهال د ننګرهار د مستوفي او تر هغه مخکې د بغلان د والي په توګه دندې ترسره کړې دي.
