د بونير د سيمې کلتوري لوبې (غشی او ليندۍ) د علومو اکاډمي اتنوګرافي موزيم ته د حسن بونیري له خوا ډالۍشول

موخه(د غشي ويشتلو لوبه)

دا لوبه د پښتونخوا وطن په زړو کلتوري لوبو کې يوه لوبه ده ، چی اوس هم د يوسفزو په سیمو بونیر (سالارزو) مردان ، کاټلنګ، شموزو ، بابوزو، مياخان، سنګاو ،صوابۍ ،هريپور، ګدون او نورو سميو کې د کلتوري لوبې په توګه تر سره کېږي ، همدارنګه د سند کراچۍ ښار په هغو علاقو چی د يادو سيمو خلک ميشت دي، د کلتوری لوبې په ډول د تير اندازۍ يا مخه لوبه کېږي.

د لوبې په هره لوبډله کې لس لس لوبغاړي وي . دا لوبه په ژمي کې د کلي په حجره کې د یو کلي او بل کلي تر مينځ هم تر سره کېږي.

په دې لوبه کې چې کوم افزار کارول کېږي ، هغې ته غشی او لينده ويل کېږي . لينده يې د دیر په سيمه کې خاص کاريګر د مارخور د ښکرو نه جوړوي.

دا غشی او لينده د بونیر سالارزو د سيمې فرهنګي شخصيت ښاغلي حسن بونیري او ښاغلي عزيز خاکسار د افغانستان د علومو اکاډمۍ اتنوګرافي موزيم ته د ښاغلي خالد سادات په لاس ډالۍ کړي دي ، چې موږ ترې مننه کوو.