د تدریس نوي میتودونه او په زده کړه کې یې رول
«د علمي ـ څېړنیزې پروژې دفاع»
د افغانستان د علومو اکاډمي، بشري علومو معاونیت اړوند د ارواپوهنې او تربیتي علومو انستیتوت علمي غړي ښاغلي نوماند څېړندوی ثناءالله صالحي د نوماندۍ دورې رفع کولو لپاره )د تدریس نوي میتودونه او په زده کړه کې یې رول) تر سرلیک لاندې له خپلې علمي ـ څېړنیزې پروژې څخه د علومو اکاډمي د څېړونکو، استادانو، پوهانو او د دفاع د ارزونې کمیسون په وړاندې دفاع تر سره کړه.
د دې علمي ـ څېړنیزې پروژې لومړي څپرکي کې د موضوع شالید روښانه شوی دی او په دویم څپرکي کې د تدریس ۷۲ نویو میتودونو پیژندنه او د هغو استعمال طریقې، د میتودونو ډولونه او په زده کړه کې د تدریس میتودونو اغیزې څېړل شوي دي. درېيم څپرکی د افغانستان په ښوونیز نظام کې د نویو تدریسي میتودونو څېړنه، د تدریسي میتودونو ټاکلو اصولو او په افغانستان کې د نویو تدریسي میتودونو پلي کولو ته ځانګړی شوی و؛ چې په دې برخه کې د دیني علومو تدریسي میتودونو څېړنه، د ټولنیزو علومو تدریسي میتودونو څېړنه، د ژبو تدریسي میتودونو څېړنه او د ساینسي علومو تدریسي میتودونو باندې مفصل بحث تر سره شوی و. په څلورم څپرکي کې د تدریسي میتودونو پرتلنه، د تدریس د دودیزو او نویو میتودونو پرتلنه او د تدریس حضوري او غیر حضوري زده کړو تدریسي میتودونو پرتلنه څېړل شوې وه او د څېړنې په وروستۍ برخه کې څېړونکي د څېړنې پایله او وړاندیزونه ذکر کړي دي.
څېړونکي د یادې پروژې په دفاعیه غونډه کې د ګډونوالو او پوهانو پوښتنو ته قانع کوونکي ځوابونه ورکړل او د ټاکل شوي کمیسون ټولو غړو د رایو په اتفاق سره له نوماند څېړندوی څخه څېړندوی علمي رتبي ته تائيد شوه او دفاعیه غونډه په دعا سره پای ته ورسیده.
