دتسليت پيغام
د اطلاعاتو او فرهنګ وزارت پخوانی سرپرست وزير او مرستيال او د کابل پوهنتون استاد پوهاند محمد رسول باوري د ورپېښې ناروغۍ له امله په حق رسېدلی دی.
انا لله وانا اليه راجعون
پوهاند باوري د افغانستان يو نامتو لرغونپېژندونکی ،ليکوال او څېړونکی و، چې کلونه کلونه يې د کابل پوهنتون د استادۍ د مقدسې دندې تر څنګ په لسګونو علمي څېړنيز اثار او په سلګونو علمي څېړنيزی مقالې د لرغوني پېژندنې په برخه کې ليکلې وې ، چې دافغانستان په لرغون پېژندنه ، تاريخ او فرهنګ کې مهم ځای لري ، چې دده له نامه پرته د افغانستان لرغون پېژندنه نيمګړې ده، موږ د پوهاند باوري مړينه د افغانستان لپاره لويه ضايعه بولو ، د افغانستان د علومو اکاډمي لوی کور د ارواښاد باوري کورنۍ او د کابل پوهنتون ته تسليت وړاندې کوي، او په دې ستر غم کې يې ځان شريک بولي،ستر څښتن دې جنت الفردوس نصیب کړي او موږ او تاسو دې خدای له نورو غمونو وساتي.
الحکم لله
