په پښتوکې د لنډکيو ژانرونو (مينيماليزم) څېړنه
( د علمي- څېړنیزې رسالې دفاع )
د افغانستان د علومو اکاډمۍ د ژبو او ادبياتو د مرکز، د پښتو ژبې او ادبیاتو انستيتوت، د ادبیاتو او متنپوهې د ډيپارټمنټ علمي غړي، نوماند څېړنوال دوکتور محمد داود عربزي د څېړنوالۍ علمي رتبې ته د لوړاوي په موخه له خپلې علمي- څېړنیزې رسالې ((په پښتو ادب کې د لنډکيو ژانرونو (مينيماليزم) څېړنه)) تر سرليک لاندې د څېړنپوه دوکتور عبدالظاهر شکيب تر لارښوونې لاندې يې بشپړه کړې وه، په بريالۍ توګه دفاع وکړه.
د دې څېړنيز اثر په لومړي څپرکي کې د موضوع په شاليد بحث شوی، په پښتو شعر و نثر کې يې مخينه روښانه شوې، په دويم څپرکي کې د لنډکيو ژانرونو پېژندنه او ډولونو څېړل شوي، چې هر ژانر په کې معرفي شوی او بيا يې پر تاريخي بهير څېړنه شوې، په پروژه کې د شاملو ژانرونو نړيوال او په پښتو ادب کې په شاليد بحث شوی.
د دې څېړنیز اثر درېيم څپرکی د لنډکيو ژانرونو شکلي او محتوايي څېړنې ته ځانګړی شوی دی، دا څپرکی د پروژې اساسي برخه ده، چې د لنډکيو ژانرونو په دې برخه کې د نويو ژانرونو پر منځپانګيز او شکلي جوړښتونو ژور بحثونه شوي، پر دې سربېره د هر ژانر پر تاريخي بهير هم رڼا اچول شوې ده.
په وروستي يا څلورم څپرکي کې د لنډکيو ژانرونو د مخکښو ليکوالو، شاعرانو او د هغوی د اثارو د پېژندنې ترڅنګ، د پروژې عمومي جاج هم اخيستل شوی او د موضوع پر بېلابېلو اړخونو کره کتنيز بحثونه هم شوي دي ، دا پروژه په اخرکې پايله، وړانديزونو او د مأخذونو فهرست لري.
د ژوري هئيت له خوا د نوموړي دفاع مثبته وارزول شوه.
