په افغانستان کې د ګرځندوی صنعت اقتصادي اهمیت څېړنه ۱۳۸۰-۱۴۰۰ هـ ش
د افغانستان د علومو اکاډمي، د بشري علومو معاونیت، د ټولنیزو علومومرکز، د اقتصاد انسټیټوټ علمي غړي ښاغلي څېړندوی شجاع الله امان «په افغانستان کې د ګرځندوی صنعت اقتصادي اهمیت څېړنه ۱۳۸۰-۱۴۰۰ هـ ش » تر سرليک لاندې علمي ـ څېړنيزه پروژه د څېړونکو او استاذانو په حضور کې دفاع کړه
ښاغلي څېړونکي وویل: دا څېړنه په دې موخه تر سره شوې چې د هېواد په اقتصادي وده او پرمختیا کې د ګرځندوی صنعت اهمیت او ونډه روښانه شي او همدارنګه په دې برخه کې د شته ستونزو رابرسېره کول او د هغو حل لارې وړاندې کول د دې علمي- څېړنیزې پروژې موخې دي. همدارنګه د ګرځندوی صنعت ونډه او اهمیت د هېوا په اقتصادي پرمختیا کې روښانه کړي او د ګرځندوی صنعت بېلابېل اړخونو په اړه به د نوې پوهې په رامنځته کېدو سره په دې برخه کې د پانګونې لپاره د پالیسیو رامنځته کولو لپاره زمینه برابره شي او د عامه او خصوصي سکتور مشارکت لپاره به فرصتونه په نښه شي.
څېړونکي په دې اثر کې د افغانستان ګرځندوی صنعت اوسنی وضعیت په بشپړه توګه معرفي کړی او د دې صنعت په اقتصادي اغېزو او ګټو باندې یې په تحلیلي توګه څېړنه ترسره کړې، چې د سریزې برسېره لومړی څپرکی یې د موضوع شالید ته ځانګړی شوی په دویم څپرکي کې عمومي مفاهیم، د ګرځندوی صنعت پېژندنه، په افغانستان کې د ګرځندوی صنعت تاریخي بهیر، موجود وضعیت مطرح شوی او مفصل معلومات په کې وړاندې شوي دي.
د دې اثر دریم څپرکی د افغانستان پر دولتي او خصوصي سکټور کې د ګرځندوی صنعت اهمیت باندې بحث شوی دی، چې د ګرځندوی صنعت اهمیت په دولتي او خصوصي سکټور کې په مفصله توګه تر بحث لاندې نیول شوی او همدارنګه په اقتصادي وده کې د ګرځندوی صنعت اغېزې هم توضیح شوې دي. څلورم څپرکی د ګرځندوی سکټور پر وړاندې ننګونې، فرصتونه او حل لارو ته ځانګړی شوی، چې د دې صنعت پر وړاندې پرتې ننګونې په کې په ګوته شوی دي او هغه فرصتونه او حل لارې چې د دې صنعت د پرمختیا لپاره اړین او موجود دي، په مفصله توګه تر بحث لاندې نیول شوی او د دې ترڅنګ دا څېړنه یوه لنډه پایله لري او ورپسې د دغه صنعت د لا پراختیا لپاره مناسب وړاندیزونه مطرح شوي دي.
د یادې علمي ـ څېړنيزې پروژې د دفاع په پای کې د څېړونکو او استاذانو پوښتنو ته قانع کوونکي ځوابونه ورکړل شول او د ارزوونکي کميسيون له لوري يې دفاع مثبته و ارزول شوه.
