«د اندواروپايي ژبو نَسبي څېړنه» اثر د دویم ځل لپاره چاپ شو!
«د اندواروپايي ژبو نَسبي څېړنه»(Genealogical Study of Indo-European Languages) د علومو اکاډمۍ د ژبو او ادبياتو مرکز د علمي غړي ښاغلي څېړنوال دکتور رفيع الله نيازي د څېړنوال علمي رتبې لپاره ليکل شوی علمي- څېړنيز اثر دی، چې د علومو اکاډمۍ د اطلاعاتو او عامه اړيکو رياست د ځينو څېړونکو او محصلينو د بيا بيا غوښتنې پر بنسټ په وزيري سایز په ۴۷۰ مخونو کې د دویم ځل لپاره چاپ کړ.
په دې اثر کې د اندوارپايي ژبو د نسبي وېش په اډانه کې پر دې څېړنه شوې، چې ژبڅانګې او ژبکورنۍ څه دي او څه ډول رامنځته کېږي؟ د افغانستان کومې ژبې په اندوراوپايي کورنۍ ورګډېږي؟ همدا راز پر دې څېړنه شوې، چې د اندواروپايي ژبو د ويونکو آر استوګنځایونه کوم و او دي او اوس په کومو ځایونو کې مېشت دي.
د اندواروپايي کورنۍ د ژبو په برخه کې جرمانيک، لاتين، سلتيک، سلاويک، منفردې، بالتيک او آريک ژبښاخونه، د دوی اړوندې ژبڅانګې او د اړوندو ژبڅانګو پر ژبو باندې نوې هر اړخيزه څېړنه شوې ده. د دې ترڅنګ په ژبنیو عناصرو کې اندواروپايي ريښه او د اندواروپايي او آرياني ژبو په غږيز سیستم کې د ژبو نَسبي اړيکې څېړل شوي او روښانه شوي او په پای کې په اندواروپايي کورنۍ کې د مستندو دلایلو او نظرياتو پر بنسټ د پښتو ژبې دريځ څېړل شوی او روښانه شوی دی.
«د اندواروپايي ژبو نسبي څېړنه» اثر په ټوله کې د یوې داسې موضوع په اړه ليکل شوی، چې تر دې دمخه يې په پښتو ژبه کې په اړه کومه ځانګړې علمي څېړنه نه وه ترسره شوې. دا اثر له څېړونکو، د پوهنتونونو د ژبو او ادبياتو پوهنځيو له محصلينو، په ځانګړي ډول د ماسترۍ دورې له محصلينو سره «د پښتو اوآرياني ژبې»، «پښتو او اوستا» او د« پښتوتاريخي ګرامر» مضمونونو په اړه په مشخص ډول او د ځينو نورو ژبپوهنيزو موضوعاتو په اړه په عام ډول ډېره مرسته کولای شي.
د دې علمي – څېړنيز اثر د منځپانګې لومړي مخونه په لاندې لينک کې لوستلی او تر لاسه کولی شئ...
يادونه: دا کتاب د علومو اکاډمي له اطلاعاتو او عامه اړيکو رياست څخه په مناسبه بيه تر لاسه کولای شئ.
د اړيکې شمېره: ۰۲۰۲۲۰۱۲۷۹
