د افغانستان د علومو اکاډمي مشرتابه پلاوي د اطلاعاتو او فرهنګ وزارت له سرپرستې وزيرې آغلې حسينې ساپۍ سره نن د ثور په ۷ مه نېټه د يکشنبې په ورځ په علومو اکاډمۍ کې ملاقات وکړ
د افغانستان د علومو اکاډمي مشرتابه پلاوي د اطلاعاتو او فرهنګ وزارت له سرپرستې وزيرې آغلې حسينې ساپۍ سره نن د ثور په ۷ مه نېټه د يکشنبې په ورځ په علومو اکاډمۍ کې ملاقات وکړ.
په دې کتنه کې د علومو اکاډمي سرپرست رئيس څېړنوال دوکتور عبدالظاهر شکېب د علومو اکاډمي پر اوسني وضعيت، ستونزو او لاس ته راوړنو خبرې وکړې.
همدا راز د علومو اکاډمي په اړه د جلالتمآب جمهور رئيس محمد اشرف غني د وروستي حکم په اړه هم نظريات تبادله شول، د اکاډمي پر اوسنيو ستونزو او حل لارو بحث وشو.
د دې ترڅنګ د هېواد پر عمومي علمي، تحقيقاتي او فرهنګي وضعيت هم هر اړخيزې څرګندونې وشوې.
په دې ملاقات کې پر دې سربېره چې د دواړو اړخونو ترمنځ په بېلا بېلو علمي فرهنګي برخو کې نظريات تبادله شول، د علومو اکاډمي او اطلاعاتو او فرهنګ وزارت ترمنځ د علمي فرهنګي همکاريو او اړيکو پر لا پراخېدو بحث وشو او ټینګار وشو چې دواړه بنسټونه به په راتلونکي کې دوه اړخيز فرهنګي فعاليتونه لا پياوړي کوي.
د دې ملاقات په پای کې د افغانستان د علومو اکاډمي له خوا په تېر ۱۳۹۸لمريز کال کې چاپ شوي کتابونه د اطلاعاتو او فرهنګ سرپرست وزيرې ته ډالۍ شول.
